Бишкекте киши колдуу болгон 48 жаштагы Жибек Урустемованын иши боюнча эки милиция кызматкери кармалды. Бул тууралуу УКМКдан билдиришти. Иш боюнча тергөө-ыкчам тобу түзүлүп, бул өзгөчө оор кылмыштын жасалышынын себептерине жана жагдайларга көңүл бурулган. Тергөө иштеринин жүрүшүндө маркумдун өмүрүнө жана саламаттыгына коркунуч жогору экенин билдирген «Жогорку деңгээлдеги» коргоо ордери болгондугуна байланыштуу жаңы жагдайлар аныкталган.

Свердлов райондук милициянын жооптуу инспектору өзүнүн кызматтык милдеттерин одоно бузуп, жабырлануучунун бир нече жолу кайрылганына карабастан, арыз ээсинин жана анын балдарынын коопсуздугун камсыз кылуу боюнча мыйзамда каралган чараларды көргөн эмес. Андан тышкары, мыкаачылык менен жасалган адам өлтүрүүдөн кийин инспектор кылмышкердин жашаган жери боюнча текшерүүлөр жүргүзүлгөндүгү тууралуу актыларды мурдагы дата менен жасалмалаган, ошентип өзүнүн аракетсиздигин жашырууга аракет кылган.

Тергөө иштеринин жүрүшүндө Бишкек шаардык милициянын Коомдук коопсуздук кызматынын улук инспектору мыйзам талаптарын одоно бузуп, айыпталуучуга травматикалык тапанчаны сактоого жана алып жүрүүгө уруксатты мыйзамсыз түрдө бергендиги жана аны узартып тургандыгы да аныкталган. Ошол эле учурда, адам өлтүрүү жасалган учурда уруксаттын мөөнөтү аяктап калганына карабастан, улук инспектор айыпталуучудан тапанчаны алып коюу боюнча эч кандай чара көргөн эмес.

Буга байланыштуу 29-декабрда эки милиция кызматкери кармалып, камакка алынды.