Ысык-Көл облусунун Кашат айылынын эки тургуну киши колдуу болгонун Ысык-Көл ОИИБдин басма сөз кызматынан билдиришти. Кечээ, 1-февраль күнү саат 20:00 чамасында Ысык-Көл РИИБдин нөөмөт бөлүмүнө Кашат айылындагы үйлөрдүн биринде эки адамдын жансыз денеси табылгандыгы жөнүндө билдирүү келип түшкөн. Бул окуя Ысык-Көл РИИБдин кылмыштардын жана жоруктардын бирдиктүү реестрине Жазык Кодексинин 130-беренесинин 2-бөлүмүнүн 11-пункту боюнча катталып, сотко чейинки өндүрүш башталган. Окуя болгон жерге Ысык-Көл РИИБдин жана Ысык-Көл ОИИБдин тергөө-ыкчам тобу чыгып барган учурда үйдүн кире бериш бөлмөсүндө баштарында катуу нерседен жаракат алышкан 1967-жылы туулган аял киши менен анын 1992-жылы туулган уулу жансыз денелерин табышкан. Алдын ала териштирүү иштерин жүргүзүү учурунда кылмышка шектүү катары каза болгон аялдын  инисинин баласы, мурда соттолгон 1995-жылы туулган жаран аныкталып, ал издөөгө алынды. Азыркы учурда сотко чейинки өндүрүш иштер боюнча тиешелүү экспертизалар дайындалып, тергөө амалдары жүргүзүлүп жатат.